Hér á landi er ekkert svínabú komið með vottun, hvorki á lífrænt ræktuðu né vistvænu svínakjöti. Íslenskt veðurfar gerir okkur erfitt fyrir að uppfylla þær kröfur sem eru gerðar til slíkra búa. Ólíklegt er að svínum af þeirri tegund sem við höfum myndi líða vel utandyra á Íslandi. En við gerum ýmislegt annað sem skiptir miklu máli til þess að láta öllum okkar dýrum líða vel. Allar okkar gyltur bera nafn sem gerir okkur auðveldara fyrir að passa upp á þarfir þeirra og veikleika. Á búinu okkar er ekki notast við nein lyf fyrir utan bóluefni. Fúkkalyf og verkjastillandi lyf eru eingöngu notuð í lífdýr sem þarfnast þess í kringum got. Það segir samt ekki að við látum önnur dýr kveljast eða hjúkrum þeim ekki heldur erum við jú að framleiða mat og þess vegna reynum við að búa þannig að dýrunum að þau verði ekki veik. Ef upp koma aðstæður sem þessar þá eru þau tekin af lífi en ekki látin kveljast. Við erum með endurvinnslu á okkar búi, flokkum td allt plast og allan pappa. Auk þess eru svínin fóðruð á umframbökuðu brauði frá bakaríum sem áður var keyrt á haugana en er afbragðs fóður ef passað er upp á aðbæta inn próteini og nauðsynlegum vítamínum.
Ég og fjölskylda mín höfum verið með svínaræktun í yfir 30 ár og í okkar huga eru svín einstakar skepnur.